Krevja ókeypis koyring

Fleiri, sum vóru við í tilgongdini, tá farið varð undir Vágatunnilin, siga, at politiska avtalan varð, at tunnilin skuldi latast landinum, tá lánið varð goldið.

Tað siga Aimé Jacobsen, borgarstjóri í Sørvágs kommunu, og Eyðdis Hartmann Niclasen, borgarstjóri í Vága kommunu, í almennum skrivi í dag.

SÍ EISINI Skulu taka støðu til ókeypis koyring

Tað er eisini tað, sum tunnilsnevndin í samráð við Vinnumálaráðið hevur arbeitt ímóti, og tað er fatanin, øll vágafólk, norðingar og føroyingar yvirhøvur altíð hava havt, siga borgarstjórarnir i Vágum.

Aimé Jacobsen og Eyðdis Hartmann Niclasen vísa eisini á tað, sum Klæmint Weihe, fyrrverandi nevndarformaður í Vága- og Norðoyatunlinum, hevur skrivað í eini viðmerking á Facebook.

Hann vísir til, at avtalað varð, at partafelagið við 160 milliónum krónum í partapeningi skuldi latast landinum aftur, tá ið lánið varð goldið, og tunnilsgjaldið takast av.

Krevja at avtala verður hildin

Tað var ongantíð borið upp á mál, at partapeningurin skuldi gjaldast aftur, skrivar Klæmint Weihe í viðmerkingini á Facebook. 

- Avtalan má og skal haldast. Tað altavgerandi er ikki, at sleppa undan at rinda nakrar krónur fyri at koyra gjøgnum tunnilin, siga teir báðir borgarstjórarnir.

- Men at ein gjørd avtala verður hildin, og at vágafólk - og norðoyingar - koyra á landsins vegum undir somu treytum sum allir aðrir føroyingar, siga borgarstjórarnir í báðum kommununum í Vágum.