Hava gjørt uppskot um fjórða leitiumfar

12.01.2017 - 07:47
AktueltPolitikkur
Hava gjørt uppskot um fjórða leitiumfar
Vinnumálaráðið hevur eisini skotið upp, at oljufeløg skulu hava møguleika at leingja loyvi í fýra ár í senn
Mynd: Savnsmynd  
 
 

Lógaruppskotið um fjórða útbjóðingarumfar í oljuleitingini við Føroyar er skrivað og sent til hoyringar.

Samstundis arbeiðir Vinnumálaráðið við ætlanum um bæði fimta og sætta útbjóðingarumfar.

Í 2019 verður farið at leita eftir olju vestanfyri Føroyar fyri fyrstu ferð.

32.000 ferkilometrar

Í fjórða útbjóðingarumfari eru leiðir eystanfyri Føroyar og í landssynning úr Føroyum. Økið er slakar 32.000 ferkilometrar. Tað er við Hetlands-rennuna.

Nakrar leiðir eru fyrr bodnar út, men loyvini eru latin innaftur. Aðrar leiðir eru ikki bodnar út áður.

Útbjóðingarumfarið byrjar á oljuráðstevnu í Havn 17.mai, og tað endar 17.februar í 2018.

Fyrsta útbjóðingarumfarið í Føroyum var í 2000. Tað triðja og higartil seinasta var í 2008.

Níggju kanningarbrunnar

Síðani 2000 eru boraðir níggju kanningarbrunnar í føroyska landgrunninum. Harafturat eru trý vísindalig borihol og meira enn 150 grunn borihol.

Eitt annað lógaruppskot, sum Vinnumálaráðið hevur sent til hoyringar, skal loyva oljufeløgum at leingja loyvið fýra ár í staðin fyri tvey ár í senn, sum galdandi lóg sigur.

Feløgini, sum fáa loyvi, sleppa at leita eftir olju í føroyska landgrunninum í mesta lagi í 16 ár.

Leitingarloyvi eru galdandi í 12 ár, men tey kunnu leingjast fýra ár. 

 

Nýggjastu sendingar í ÚV
Mánadag 18. desember
Meg minnist: Simme Jacobsen (2:2)
75647
Mánadag 18. desember
Morgunlestur mánadagur 18. desember 2017
75571
Sunnudag 17. desember
Guðstænasta í Vestmanna kirkju
75633
Sunnudag 17. desember
Bolero
75632
Sunnudag 17. desember
Upp á tá
75629
Nýggjastu sendingar í SV
Sunnudag 17. desember
Møti um borð á Brimli
75637
Sunnudag 17. desember
Andaktin
75636
Hósdag 14. desember
Koba & Vatnhamar II (4:4)
75534
Hósdag 14. desember
Savnsgull: Slóðin 2:3
75542
Mikudag 13. desember
25 minuttir: Ronnie Midjord
74873