Illgrunin til varðhaldsfongslaðu menninar styrktur

Úrslitið av kanningunum av blóðinum, sum varð funnið í reyða Kia Rio-bilinum, styrkir illgrunan hjá løgregluni í Reykjavík um, at sjómenninir báðir, sum sita í varðhaldi, hava ábyrgdina av, at hon er deyð, skrivar Vísir. 

Grímur Grímsson, kanningarleiðari í málinum um Birnu Brjánsdóttir, sigur, at reyði Kia Rio-bilurin hevur koyrt tilsamans 300 kilometrar teir báðar dagarnar, sum menninir umborð á grønlendska trolaranum, Polar Nanoq, leigaðu bilin. 

                Les eisini: Minnast Birnu Brjánsdóttir í Nuuk

Líkið av Birnu varð funnið í fjøruni við Selvogsvita, og kanningarleiðarin sigur, at tað samsvarar við kilometrartalið, sum løgreglan hevur roknað út, hvar bilurin hevur koyrt. 

- Hetta er ikki longri burtur, enn vit høvdu roknað við, og hetta staðið var eisini partur av leitingarøkinum, segði Grímur Grímsson, í samrøðu við blaðið Vísir.

                Les eisini: Líkið av Birnu Brjánsdóttir funnið

Spurdur, hvørja leið, menninir eru komnir til vitan, sigur Grímsson, at tað eru bara tveir mátar. (Sí kortið omanfyri).

Spurdur, um løgreglan hevur myndir, sum vísa reyða Kia Rio-bilin í økinum, svarar hann, at nú verður farið at leitað í myndunum frá økinum, har Birna varð funnin.

Hann sigur, at menninir kunnu hava tveitt líkið í havið aðrastaðni, enn júst við Selvogsvita.