Uppskot um Filmshúsið til hoyringar

Ein millión er sett av til Filmshúsið á fíggjarlógini fyri 2017, og nú er eitt lógaruppskot um tað sent til hoyringar.

Endamálið við Filmshúsinum er at menna føroyska filmsvinnu og Føroyar sum filmsland, umframt at vera savnandi depil og birta upp undir film sum vinnu.

Filmshúsið skal ráðgeva og leiðbeina føroyskum filmsfólkum, og vera savningarstaður hjá føroyska filmsumhvørvinum. 

Tað skal marknaðarføra føroyskan film uttanlands, marknaðarføra Føroyar sum filmsland, vera ráðgevi í sambandi við filmsgerð, og hækka førleikastigið í filmsgerðini í Føroyum.

Veljast skal stýri við trimum fólkum. Landsstýrisfólkini í ávikavist vinnumálum og mentamálum og Felagið føroysk filmsfólk velja fólk í stýrið.

Hóast heitið er Filmshús er ikki ætlanin at byggja eitt filmshús. Ein skrivstova verður í fyrsta umfari leigað til leiðaran og atgongd til fundarhøli, og miðað verður eftir, at Filmshúsið og filmsverkstaðurin Klippfisk seinni vera í somu hølum.

Upplýst verður í viðmerkingunum um lógaruppskotið um Filmshúsið, at lógaruppskot kemur í vár um, at ein fjórðingur av tí, sum filmur og sendirøðir kosta at gera í Føroyum, verður latin í studningi úr landskassanum.