Málið ikki liðugt í ár

Tað sigur Henrik Old, landsstýrismaður, í svari til Jacob Vestergaard, løgtingsmann. Landsverk og byggifelagið TG Verk eru ósamd um arbeiðið í Marknagili.

Ósemjan er um tíggjutals milliónir krónur. og báðir partar hava krøv hvør móti øðrum. Sambært landsstýrismanninum hevur Landsverk ikki rindað pening fyri arbeiði, sum ikki er gjørt. 

Arbeiða eftir upprunaligu ætlanini

Høvuðsarbeiðstakarin, TG Verk, boðaði frá í oktober í 2015, at felagið steðgaði arbeiðinum, um Landsverk ikki rindaði 15 milliónir krónur fyri arbeiði, sum felagið segði var eyka arbeiði. 

Landsverk var ósamt, so kravið fór í gerðarrætt. Viðvíkjandi kostnaðinum, so verður arbeitt eftir upprunaligu kostnaðarætlanini.

Men útreiðslur í sambandi við ósemjur og krøv eru lagdar fyri gerðarættin at taka støðu til, sigur Henrik Old, landstýrismaður, í svarinum.