Lastbilur koyrt á fólk í Svøríki

Enn er óvist, hvussu nógv fólk eru deyð og hvussu nógv hava fingið skaða eftir at ein lastbilur hevur koyrt inn í eina mannamúgvu í einari av høvuðsgøtunum í Stokkhólmi.

Sí upptøkuna niðast í greinini

Svenska sjónvarpið sigur, at trý fólk eru deyð og fleiri onnur hava fingið skaða, men svensku myndugleikarnir hava kortini ikki alment váttað tey tølini enn.

Løgreglan ávarar um, at talan er um eina yvirgangsatsókn. Tí er svenski Ríkisdagurin í løtuni avbyrgdur, skrivar svenska útvarpið á heimasíðuni.

Greinin heldur fram niðanfyri

atsokn-ahlens-stockholm-07042017.jpg

Tað var her í Åhlens-keypsmiðstøðini, at lastbilurin rendi inn í eina mannamúgvu fyri løtu síðani

Lastbilurin, sum gerningsmaðurin brúkti at koyra inn í mannamúgvuna, varð stolin frá einari matstovu fyrr í dag, sambært frásøgn í svenska sjónvarpinum, ið sendir beinleiðis frá hendingini.

- Lastbilurin koyrdi við høgari átta fólk niður við Åhlens-keypsmiðstøðina og fýra onnur fólk lógu eftirá longur burturi, sigur ein sjónarvátti sambært svenska sjónvarpinum, SVT.

Greinin heldur fram niðanfyri

At least two people killed as truck drives into crowds and crashes into a department store in #Stockholm. Latest on Sky News pic.twitter.com/AdhliRjvjs

— Sky News (@SkyNews) April 7, 2017

Í hesari sjónbandaupptøkuni hjá Sky News síggjast fólk renna fyri lívinum eftir at lastbilurin hevði rent inn í mannamúgvuna í svenska høvuðsstaðnum fyri løtu síðani.

Svenska løgreglan heitti eftir hendingina á fólk í svenska høvuðsstaðnum um at halda seg burtur frá miðbýnum í Stokkhólmi, skrivar tíðindastovan hjá Reuters.