Kringvarpið fær nýggjan stjóra

Kringvarp Føroya skal hava nýggjan stjóra. Stýrið fyri Kringvarpið lýsir ídag eftir stjóra til stovnin at byrja 1. august.

Tá hevur Dia Midjord verið stjóri í fimm ár. Hann var áramálssettur í fimm ár.

Vil ikki siga, hví hann ikki heldur fram

Dia Midjord hevur boðað Kringvarpsstýrinum frá, at hann gevst sum kringvarpsstjóri, tá fimm ára skeiðið er runnið, 31. juli.

Dia Midjord, sum fyllir 50 ár í juni, vil í løtuni ikki greiða frá, hví hann ikki hevur hug at halda fram sum stjóri fyri Kringvarp Føroya.

Starvið sum stjóri fyri Kringvarpið er áramálssett í fimm ár. Starvið er lønt samsvarandi 38. lønarflokki í avtalu millum Tænastumannafelag Landsins og Fíggjarmálaráðið, tó uttan at verða tænastumannastarv. Afturat hesum verður latin ein iviðbót fyri áramálssetan. 

Nýggi stjórin byrjar 1. august

Stjórin hevur dagligu programmábyrgdina og røkir fyrisitingarligu og búskaparligu leiðsluna av Kringvarpi Føroya. Sambært lýsingini skal stjórin vera savnandi, myndandi og skal ganga á odda fyri stovnin.

Stjórin skal hava viðkomandi leiðsluroyndir, viðkomandi miðallanga ella langa útbúgving, innlit í føroyska mentan, samfelagsviðurskifti og greiða fatan av public service uppgávum Kringvarpsins.

Eisini skal stjórin megna at leiða og skapa eldhuga hjá starvsfólkunum, at fylgja settum málum og støðugt at taka við nýggjum avbjóðingum. Freistin at søkja stjórastarvið er 19. mai, og nýggi stjórin byrjar í starvinum 1. august.