- Tíðindi, mentan og ítróttur
Flyting kostar Setrinum 10 milliónir
![](https://kvf.fo/sites/default/files/styles/grein-ovasta-mynd/public/setur-sjovinnuhus.jpg?itok=2Ky1YQvI)
Peningurin skal takast av kontoini, ið skuldi nýtast til at fyrireika nýtt kampus. Tað váttar Sigurð í Jákupsstovu, rektari á Fróðskaparsetrinum, fyri útvarpinum.
Neyðugt er at inrætta bygningin, so hann kann nýtast til fróðskaparsetur, nú ætlanin er, at Sjúkrarøktarfrøðideildin og Náttúruvísindadeildin á setrinum skulu flytast í Sjóvinnuhúsið á Vestaru bryggju í Havn.
Fyri á býráðsfundi í gjárkvøldið
Leigusáttmálin millum Tórshavnar kommunu og Fróðskaparsetrið og Mentamálaráðið var fyri á býráðsfundi hjá Tórshavnar býráði týskvøldið. Í fundarskránni stendur:
"Setrið skal standa fyri tillagingum á 2, 4 og 5 hædd í Sjóvinnuhúsinum, og Tórshavnar havn skal standa fyri at gera fyrilestrarsalin í siloini lidnan."
Leigusáttmálin er ikki undirskrivaður enn, men í fundarskránni stendur, at samlaða leigan, tá liðugt er at flyta inn, verður góðar 4.573.000 krónur um árið, slakar 381.000 um mánaðin
SÍ EISINI Starvsfólk: Flyting verður vanlukkulig
Hesir pengarnir skulu millum annað takast frá kontuni, sum skuldi nýtast til at fyrireika nýtt kampus. Á henni eru settar átta milliónir krónir av í ár og 10 milliónir næsta ár.
Til hevur ikki borið hjá útvarpinum at fingið innlit í leigusáttmálan. Tí er ikki greitt, hvussu leingi Setrið ætlar at leiga Sjóvinnuhúsið, men um Setrið leigar Sjóvinnuhbúsið í 10 ár, verður kostnaðurin til samans 55 milliónir krónur.
Hetta halda Náttúruvísindadeildin, og Sjúkrarøktarfrøðideildin, sum hava mótmælt, at deildirnar skulu flyta í Sjóvinnuhúsið, er ein óneyðuga dýr loysn.
SÍ EISINI Næmingar og starvsfólk eru ónøgd við Sjóvinnuhúsið
Tey mæla í skrivi til stýrið fyri Fróðskaparsetrið til eina loysn, sum sambært teimum er 42 milliónir krónur bíligari. Og tað er at byggja eina undirvísingarlon á Frælsisvøllin fyri umleið 10-12 milliónir krónur.
Haraftrat mæla tey til ókeypis at yvirtaka undirvísingarlonina í Hoydølum, sum Mentamálaráðið eigur, tá miðnámsskúlanæmingarnir eru fluttir niðan á Marknagil. Við báðum lonunum kunnu 32 høli fáast til vega fyri 13 milliónir krónur samanlagt, meta tey í skrivinum.
Í juni 2016 fekk Rigmor Dam, landssstýriskvinna í mentamálum handað álit um millum annað nýtt kampus. Tá varð lagt upp til, at Fróðskaparsetrið skuldi vera á Frælsinum, Nóatún og Debesartrøð.
Mæla til bíligar fyribilsloysnir
I einum øðrum skrivi, útvarpið hevur fingið innlit í, frá fundi á Náttúruvísindadeildini tann 10. mai um flytingina í Sjóvinnuhúsið, vísir starvsfólk á deildini á, at tað hevur týdning at finna eina so bíliga fyribilsloysn sum gjørligt til eitt nýtt kampus stendur klárt, tí sparingar longu hava verið framdar á Setrinum.
Í skrivinum stendur:
"Í staðin fyri nevndu bíligu hølismøguleikarnar, so hevur leiðslan á Fróðskaparsetri Føroya saman við Mentamálaráðnum læst seg fæstan í eina dýra og vánaliga loysn, nevniliga Sjóvinnuhúsið."
Víðari stendur:
"Henda kostnaðarmikla raðfesting er ikki løtt at skilja, tá upphæddir til leysalærarlønir og próvtøkur í Havlívfrøði, Mýlalívsvísindi, Vistfrøði, Orkuverkfrøði og KTverkfrøði hava verið og verða skerdar í ólukkumát. Ja so nógv, at útbúgvingarnar við vissu verða dygdarlækkaðar og fráfallið fer at hækka."
SÍ EISINI Fleiri áhugað í at leiga
Náttúruvísindadeildin og Sjúkrarøktarfrøðideildin hava víst á, at hølisviðurksiftini í Sjóvinnuhúsinum eru ikki hóskandi til hesar útbúgvginar. Eitt nú er ikki møguleiki fyri at innrætta smærri skrivstovur - sonevndar einsærisskrivsstovur - og pláss er ikki er fyri virkisstovu í lívfrøði.
Á Náttúruvísindadeildini ásanna tey tó, at hølistrot er á Fróðskaparsetrinum, tí talið av útbúgvingum, studentum og starvsfólki er vaksið tey síðstu árini.
Vísa á stórt hølistrot
Hinar deildirnar á Fróðskaparsetrinum, sum útvarpið hevur tosað við, vísa á, at stórt hølistrot er á Setrinum. Setrið húsast í 10 ymiskum bygningum í løtuni. Tí er neyðugt at finna eina loysn uppá hølistrupulleikarnar. Men Náttúruvísindadeildin heldur ikki, at allir møguleikar eru troyttir.
Í skrivinum frá fundinum á Náttúruvísindadeildini verður eisini skotið upp, at maritimu stovnarnir, Havstovan og Vinnuháskúlin, kundu verðið spurdir, um teir vildu farið oman í Sjóvinnuhúsið, so Fróðskaparsetrið kundi flutt inn, har teir húsast.
"Henda flyting, um framd í verki, hevði verið savnandi og mennandi fyri Fróðskaparseturlandsins eins og fyri maritimu útbúgvingarnar og virksemi tjóðarinnar," stendur í fundarskrivinum.