Fiskavørur strikast í lógaruppskotinum

Ætlanin hjá Vinnumálaráðnum var at sleppa fleiri matvørum undan løggilding ella skráseting. Men seks av sjey limum í Vinnunevndini mæla til at strika fisk, fiskavørur og skeljadjór í lógaruppskotinum.

Tingmenn í samgonguni og í andstøðuni halda, at fiskivinnan er so stórur og týðandi partur av føroyska samfelagnum, at teir mæla til ikki at slaka krøvini til føroyskar fiskavørur. 

SÍ EISINI Matvørulógin aftur broytast

Teir halda eisini, at uppskotið er ov víðgongt viðvíkjandi víðari framleiðslu í Føroyum úr innfluttum matvørum. Tingmenninir mæla tí til, at lógin bara verður broytt til at umfata mjólkarúrdrátt og svínakjøt.

Teir hugsa tá um ostar og skinkur, sum verða innflutt til at ræsa og turka í Føroyum. Samgongutingkvinna Bjørt Samuelsen mælir rætt og slætt Løgtinginum frá at samtykkja alt uppskotið hjá Poul Michelsen. Løgtingið fer at atkvøða um uppskotið í dag.