Trygt at fara heimaftur

Fólk á Tvøroyri, sum fríggjadagin máttu rýma frá húsum tí vandamikil ammoniak-roykur var í luftini, tá eldur kom í Varðan Pelagic, kunnu nú fara til hús aftur.

Tað segði Jaspur Vang, økisleiðari hjá løgregluni í Suðuroy, í eyka tíðindasending í útvarpinum klokkan 11. Trygdarfrástøðan uppá 300 metrar er sostatt strikað.

Einasta økið, sum framvegis er sperrað, er sjálvt havnarlagið á Tvøroyri, frá Doktaragøtu og eystureftir. Tað økið verður helst eisini sperrað í nakrar dagar afturat.

Løgreglan sendi út fráboðanina niðan fyri á Facebook beint fyri klokkan 11.