- Tíðindi, mentan og ítróttur
Nógv fangað í Mosul
Fólkini eru í stórum vanda, sigur samskiparin hjá ST í Irak, Lise Grande. Sivilfólkini sum royna at flýggja úr økinum, verða myrd av IS, sum roynir at forða teimum í at fara úr býnum.
Islamskur Statur hevur framvegis valdið í pørtum av gamla býarpartinum í Mosul, og hildið verður, at 300 hermenn hjá IS eisini eru í økinum.
Mosul tikin um fáar dagar
Irakiski herurin sum í oktober í fjør, setti sær fyri at taka Mosul, roknar nú við, at Mosul verður tikin um fáar dagar.
Iraksku deildirnar fáa hjálp hjá frá kurdiskum og shiamuslimskum deildum, og frá amerikanskum flogførum sum søkja at málum hjá IS.
Islamskur Statur tók Mosul, sum er næststørsti býurin í Irak á sumri í 2014. Stutt eftir boðaði leiðarin fyri IS frá, at býurin skuldi vera høvuðsstaður í kalifatinum, sum Islamskur Statur setti sær fyri at stovna.