Tingmenn skuldseta Mentamálaráðið fyri lógarbrot

Hetta er eitt mál fyri bæði Landsgrannskoðanina og Landsstýrismálanevndina, sigur minnilutin í Fíggjarnevndini, Bill Justinussen, Bárður Nielsen og Jacob Vestergaard.

Teir vísa til pengarnar, sum Mentamálaráðið sambært teimum, hevur goldið ES í heimildarloysi.

Talan er um 1,1 millión krónur.

Tingmenninir siga, at í uppskotinum um eykajáttan, sum kom í mai, bað Mentamálaráðið um 1,1 mio. kr. til ES-granskingarskránna.

Orsøkin er stóri vøksturin í føroyska bruttotjóðarúrtøkuni. 

Og gjaldið til ES-granskingarskránna er í lutfalli við bruttotjóðarúrtøkuna. Tað er tí vaksið, síðani fíggjarlógin fyri 2017 varð samtykt. 

Men Mentamálaráðið fekk ikki hesar pengarnar í vár, tí uppskotið um eykajáttan datt burtur.

Tað kom so aftur í tingið í august.

Ikki við aftur

Men nú bað Mentamálaráðið ikki um 1,1 mió. kr.

Pengarnir eru goldnir, fekk Fíggjarnevndin at vita.

Við øðrum orðum er peningurin goldin í heimildarloysi. 

At gjalda pening í heimildarloysi er ólógligt, sambært stýrisskipanarlógini, siga teir tríggir andstøðumenninir í Fíggjarnevndini.

Teir halda, at grannskoðanin eigur at viðgera hetta málið.

Eisini eigur Landsstýrismálanevndin at umhugsa at taka málið upp, nú landsstýriskvinnan ólógliga hevur útgoldið 1,1 mió. kr., siga Bill Justinussen, Bárður Nielsen og Jacob Vestergaard, løgtingsmenn.
 

Lesið meira her