Kristin Michelsen verður eisini løgtingsmaður

31.01.2018 - 21:22
AktueltPolitikkur
Kristin Michelsen verður eisini løgtingsmaður
Meirilutin á Tvøroyri fer ikki at krevja, at Kristin Michelsen skal velja, um hann vil vera borgarstjóri ella løgtingsmaður. Í øllum førum ikki enn.
 
 

Kristin Michelsen sleppur til arbeiðis á Tinghúsvegnum í Havn, tá løgtingsfundur verður í næstu viku.

Nýggi meirilutin heldur, at hann skal sleppa at vera bæði borgarstjóri og løgtingsmaður. Fyribils, í øllum førum.

Atkvøddu ikki fyri

Tað var annars ikki støðan hjá javnaðarfólkunum á Tvøroyri í fjør.

Býráðið á Tvøroyri samtykti tann 13. februar í fjør, at Kristin Michelsen kann vera bæði borgarstjóri og løgtingsmaður.

Táverandi meirilutin, Kristin Michelsen, Kristina Roest, Anita Vibergsdóttir og Alvi Mortensen, atkvøddu fyri.

Minnilutin, umboðini fyri Javnaðarflokkinum, atkvøddu ikki fyri.

Súsanna Bertholdsen atkvøddi ímóti og segði, at borgarstjórin eigur at vera til staðar og at vera tøkur hvønn dag. Tað skrivaði tíðindaportalurin in.fo, sum var á býráðsfundinum, tann 14. februar í fjør.

Bogi Johannesen og Bjarni Hammer atkvøddu ikki.

Verður í báðum støðum

Kristin Michelsen hevur nú sum borgarstjóri ikki meirilutan í býráðnum.

Tað fekk eisini avleiðingarnar fyri landsstýrið í Tinganesi.

Sum løgtingsmaður fyri Javnaðarflokkin hevur Kristin Michelsen boðað løgmanni frá, at hann er ikki bundin at atkvøða saman við Javnaðarflokkinum í løgtinginum.

Orsøkin er, at umboðini hjá Javnaðarflokkinum í býráðnum á Tvøroyri vilja ikki samstarva við seg.

Javnaðarfólkini á Tvøroyri kunnu nú forða Kristin Michelsen at sita í báðum støðum og samstundis forða fyri, at tvídrátturin á Tvøroyri ávirkar samgongustevið í løgtinginum.

Men tað er ikki aktuelt, sum støðan er, sambært Bjarna Hammer.

- Tað er ikki nakað, vit viðgera júst nú. Meira er ikki at siga um tað, sigur Bjarni Hammer.

Hann hevur onga viðmerking um støðuna, sum javnaðarumboðini tóku á býráðsfundinum á Tvøroyri í fjør. Tað hava Súsanna Bertholdsen og Bogi Johannesen heldur ikki.

Løgtingið skal taka støðu

Kommunustýrini kunnu annars skjótt missa rættin at forða borgarstjórum at vera í løgtinginum.

Miðflokkurin heldur, at ein borgarstjóri í fullum starvi, sum verður valdur á ting, eigur at kunna taka við tingstarvinum, uttan at fáa loyvi frá einum meiriluta í einum kommunustýri.

Jenis av Rana og Bill Justinussen er farnir í løgtingið við lógaruppskoti, sum ber við sær, at kommunustýrini kunnu ikki taka rættin frá borgarstjóranum at røkja bæði størvini samstundis.

Flokkurin heldur, at tað er í stríð við fólkaræðið, at nógv fólk kunnu velja borgarstjórar í løgtingi, sum síðan ikki sleppa í løgtingið fyri nøkrum fáum fólkum í einum kommunustýri.

Tað uppskotið verður samtykt, um andstøðan og Kristin Michelsen atkvøða fyri.

Tjóðveldismaðurin Pauli Trond Petersen og sjálvstýrismaðurin Jógvan Skorheim eru eisini bæði løgtingsmenn og borgarstjórar.

Nýggjastu sendingar í ÚV
Leygardag 16. februar
Morgunlestur leygardagur 16. februar 2019
90854
Fríggjadag 15. februar
Pressan: Skert alment innlit um menningarkvotur
91260
Fríggjadag 15. februar
Góðan morgun Føroyar 150219
91259
Fríggjadag 15. februar
Hyggjuráðið: Hoyr nýggju ummælarasendingina
91247
Nýggjastu sendingar í SV
Fríggjadag 15. februar
Lyst 27
91270
Hósdag 14. februar
Stella Polaris 2019
91229
Hósdag 14. februar
Stella Polaris
91224
Mikudag 13. februar
Landafrøðingurin og testamentið (3:8)
90632
Mikudag 13. februar
Matkovin (6:10)
91168