Kunoyar kommuna kært umhvørvisgóðkenning

Orsøkin er, at umhvørvisgóðkenningin ikki er nóg ítøkilig, sigur borgarstjórin í Kunoyar Kommunu, Sóleyð Klettskarð í Kongsstovu.

Tað var longu í 2015 at Bakkafrost søkti um umhvørvisgóðkenning til nýggju stóru smoltstøðina á Strond.

Árið eftir var ætlanin meira ítøkilig, og tá fekk Umhvørvisstovan meira nágreinligt tilfar um ætlanina.

Seinast í januar í ár gav so Umhvørvisstovan Bakkafrosti umhvørvisgóðkenningina við ymsum treytum, eftir at fleiri partar høvdu ummælt ætlanina, m.a. Kunoyar kommuna og Klaksvíkar kommuna.

Tá umhvørvisgóðkenningin varð givin, fingu partarnir at vita, at teir kundu kæra avgerðina til landsstýriskvinnuna í umhvørvismálum.

Og tað hevur Kunoyar kommuna valt at gera, sigur Sóleyð Klettskarð í Kongsstovu, borgarstjóri.

Smoltstøðin skal ala 5 milliónir smolt

Talan er um eina stóra smoltstøð, sum skal ala 5 milliónir smolt um árið. Reinsiskipan skal reinsa vatnið, so tað mesta kann nýtast aftur.

Roknað verður við 5.000 tonsum av fóðri til smoltini, og mett verður, at skarnið frá alingini verður 750 til 1.000 tons um árið, umframt nakað av fóðurspilli

Tá talan er um óljóð frá bátum og skipum, sum hoyra til virksemið, skal tað vera so skynsamt sum gjørligt, og Heilsufrøðiliga Starvsstovan kann krevja broytingar, eisini um ljósið er til ampa.

Í seinasta lagi 1. apríl í ár skal Bakkafrost boða frá, hvussu og hvat skal gerast við skarnið, tí hildið verður ikki at tað kann fara í Haraldsund, og tí hevur Bakkafrost umhugsað at lata skarnið í leiðing tvørturum Kunoynna og í Kalsoyarfjørð, har streymur er.

Og tað er tað sum órógvar Kunoyar kommunu, sigur Sóleyð Klettskarð í Kongsstovu