Statsadvokaturin: Vit kanna málið

- Avhoyringar eru gjørdar, og vit kannað málið nú, sigur statsadvokaturin, Henrik Plæhn. 

Henrik Plæhn, sum er ákæri hjá Statsadvokatinum í Danmark, sigur við Kringvarpið í dag, at tey hava málið um Bjarna Hammer um hendur, og at tey hava sagt løgregluni í Keypmannahavn frá, sum handferð avhoyringar í málinum.

Ov tíðliga at siga nakað

Henrik Plæhn sigur, at tað enn er ov tíðliga at siga nakað ítøkiligt, tí málið er somikið nýtt. Í løtuni kanna tey tilfarið, ið er fingið til vega, og at meir fæst at vita um nakrar vikur.

Advokaturin hjá Bjarna Hammer, Jógvan Páll Lassen, hevur onga viðmerking til málið.

Sosialurin legði í blaðnum mánadagin Bjarna Hammer undir at hava viljað skaffað ungdómi hasj.

SÍ EISINI: Lagdur undir at skaffa hassj

Strangar etiskar leiðreglur í politinum

Afturat politikanningunum, so noyðist Bjarni Hammer eisini at lata seg viga á disciplineru vágskálini hjá politivaldinum.

Politivaldið hevur sera strangar leiðreglur um etikk hjá sínum starvsfólki - sokallaða decorum-kravið. Hesi eru m.a. útgreinað í bóklinginum "Etik i Politiet", sum verður brúkt á Politiskúlanum. Í innganginum stendur soleiðis:

"At verða tænastumaður hjá løgregluni snýr seg um álit. Tí er tað umráðandi, at tú førir teg fram virðiliga, meðan tú er í tænastu - og harafturat skal tú eisini halda teg frá viðurskiftum uttanfyri tænastuna, sum kann hava við sær, at fólk missa álit á tær sum persóni". 

Víst verður eisini á, hvussu løgreglufólk skal skikka sær alment, hvussu tey eiga at málbera seg, hvussu teirra atburður eigur at vera á sosialum miðlum, og at løgreglufólk ikki skal taka ímóti avsláttri, gávum og øðrum, sum kann seta teirra óheftu støðu í vanda.

Fleiri discipliner-mál

Á hvørjum ári eru mong sokallað disipliner-mál eftir tænastumannalógini í donsku løgregluni.

Hetta eru mál, har løgreglufólk eru farin út um etisku mørkini í decorum-kravinum.

Starvsrættarligu revsingarnar fyri hesi brot fevna frá ávaring og til at missa starvið. Er talan um lógarbrot, verður ákæra eisini reist móti viðkomandi.