Óvissa um endurgjald fyri fyritíðarpensjónir

bannari
26.03.2018 - 12:02
AktueltPolitikkur
Óvissa um endurgjald fyri fyritíðarpensjónir
Kommunurnar fáa enn onga vissu fyri, um tær fáa endurgjald fyri tað, tær mistu, tá samgongan hækkaði fyritíðarpensjónirnar 1.000 kr um mánaðin
 

Tað einasta, sum løgmaður kann lova teimum, er, at landsstýrið framvegis hevur sum mál, at kommunurnar ikki skulu missa pengar av lógaruppskotum hjá samgonguni.

Tað gongur fram av svarinum, sum løgmaður hevur givið Brandi Sandoy, løgtingsmanni, sum spurdi um endurgjald til kommunurnar í sambandi við, at fyritíðarpensjónirnar hækkaðu.

Brandur Sandoy vildi hava løgmann at svara, um hann ætlar at halda lyftið, hann gav kommununum á fundi í Tinganesi í oktober um at geva kommununum fult endurgjald fyri missin, tá samgongan hækkaði fyritíðarpensjónirnar 1.000 krónur um mánaðin. 

Løgmaður svarar, at tað hevur verið siðvenja seinastu árini, at lógarbroytingar sum hava stóra fíggjarliga ávirkan á kommunurnar, verða neutraliseraðar í fylgilóggávu.

Men í sambandi við broytingarnar í fyritíðarpensjónini valdu tey at bíða við fylgilógini, tí uppskotið um pensjónsnýskipan var á veg. Og tað sama eru aðrar broytingar, sum fara at ávirka kommunurnar fíggjarliga.

- Tí varð mett skilabest at bíða, til greiða var fingin á, hvat samlaða úrslitið fór at verða fyri kommunurnar, sigur løgmaður.

Landsstýrið hevur í heyst havt fund við Kommunufelagið. Har fingu kommunurnar bjóðað 13,5 milliónir krónur í endurgjaldi, sum skal gjaldast teimum eftir talinum á fyritíðarpensjónistum. Kommunurnar vrakaðu uppskotið, og tí bleiv onki endurgjald játtað fyri 2018.

- Men málið hjá landsstýrinum er framvegis, at kommunurnar samanlagt ikki skulu vera fyri fíggjarligum missi vegna lógaruppskot hjá sitandi samgongu. Tá lógarmálini, sum nú eru í Løgtinginum, eru viðgjørd og samtykt av Løgtinginum, verður greitt, hvør samlaða ávirkanin verður á kommunurnar. Tá er ætlanin at taka málið upp aftur við kommunurnar, lovar løgmaður í svarinum til Brand Sandoy. 
 

 
Nýggjastu sendingar í ÚV
Mánadag 28. september
Nón 28. september 2020
114055
Mánadag 28. september
KÍ hevur størstu avbjóðingina í søguni
114053
Mánadag 28. september
Norðurljóð 28.september 2020
113957
Mánadag 28. september
Áðrenn Elvis
114051
Mánadag 28. september
Góðan morgun Føroyar 28.09.20
114040
Nýggjastu sendingar í SV
Sunnudag 27. september
Guðstænasta úr Kollafjarðar kirkju
114003
Sunnudag 27. september
Andaktin
114007
Mikudag 23. september
Drúgt sjónvarp
113851
Mikudag 23. september
Myndir fyri sologuitar eftir Kára Bæk
113720
Týsdag 22. september
Fótbóltur: Føroyar - Hvítarussland
113812