Poul Michelsen er illur um samgonguna

- Tað ber ikki til, at samgongufólk í sjálvdrátti saman við andstøðuni, nærum dagliga koma við nýggjum ætlanum um at bora tunlar. Heldur hetta arbeiðslagið fram, hevur samgongan ongan livandi møguleika at halda fram.

Tað sigur Poul Michelsen, landsstýrismaður og formaður í Framsókn, í samrøðu við in.fo.

Ávarar javnaðarflokkin

Poul Michelsen útgreinar síni sjónarmið á Rás2, har hann serliga leggur eftir Javnaðarflokkinum, har løgtingslimir hvør í sínum lagi fara í part við andstøðuni um ymsar, alternativar tunnilsætlanir, sum samgongan als ikki er samd um.

- Í løtuni tykist sum um Javnaðarflokkurin koyrir í fýra-fimm ymiskar rætningar, sum ikki eru í tráð við avtalurnar í samgonguni, sigur Poul Michelsen við Rás2.

Formaðurin í Framsókn ávarar rætt og slætt Javnaðarflokkin, at tekur hann ikki betri partar fyri seg, slitnar samgongan.

Garvillur politikkur

Í samrøðuni við in.fo vísir Poul Michelsen á, at í sambandi við fiskivinnunýskipanina mátti samgongan at kalla keypa sær stuðul frá tinglimum úr Javnaðarflokkinum, fyrst og fremst teimum úr Suðuroy. Úrslitið av tí var ein fiskivinnuskipan, har tað, ið kann kallast ein nýskipan, er á lægst hugsandi stigi.

Og nú í seinastuni eru tinglimir í Javnaðarflokkinum eisini farnir í part við andstøðuni um at gera tunlar ymsa staðni. Eitt nú eru bæði Heðin Mortensen og Kristin Michelsen við í einum uppskoti, saman við andstøðuni, um at knýta arbeiðið at gera ein nýggjan Fámjinstunnil upp í ætlanina at gera tann nýggja Hvalbiartunnilin. Og nú gloppar eisini Hendrik Old, landsstýrismaður í samferðslumálum, hurðina fyri at framskunda tunlarnar Norður um Fjall. 

- Vit hava eina greiða avtalu í samgonguni um, hvar og nær vit skulu gera teir ymsu tunlarnar, og tann avtalan skal haldast. Skal hon broytast, skal tað vera samgongan, sum semist um tað, sigur Poul Michelsen við in.fo.

Á Rás2 dregur formaðurin í Framsókn soleiðis samanum stevið í samgonguni:

- Í løtuni sær út til, at alt er farið upp í ein garrvillan politikk um tunlar í allar endar og kantar. Tað finni eg meg simpulthen ikki í, tí vit hava hvørki rúm ella brúk fyri slíkum, sigur Poul Michelsen.