Meiriluti fyri rættinum at ganga frítt í haganum

Meira enn annað hvørt fólk, sum varð spurt í kanningini, sum Lóður gjørdi fyri Kringvarpið í síðstu viku, heldur, at tað skal vera ein hvørsmansrættur at ganga frítt í haganum í Føroyum.

57,7 prosent halda tað.

Serliga tey millum 30 og 44 ár halda, at fólk eiga at kunna ganga frítt í haganum. Har er prosentið góð 63.

Síðani koma tey 18 til 29 ára gomlu við 56 prosentum.

Tey elstu, tey, sum eru 60 ár ella eldri, eru ikki so nógv, men kortini oman fyri 50 prosent, knappliga 55 prosent.

Flokkar og hvørsmansrættur

Fólk vórðu eisini spurd, hvønn flokk, tey velja, og hvat tey halda um hvørsmansrættin at gangan frítt í haganum.

Øll, sum siga seg velja Miðflokkin, halda, at tað skal vera frítt at ganga í haganum.

Framsókn er niðast, har eru prosentini 36.

Tey, sum siga seg velja Sjálvstýri, eru eisini fyri hvørsmansrættinum, tey flestu, ið hvussu so er. Har er prosentið oman fyri 70.

Síðani koma Javnaðarflokkurin, Sambandsflokkurin, Tjóðveldi og Fólkaflokkurin. Meira enn helvtin av teimum spurdu vóru fyri hvørsmansrættinum.

532 fólk vórðu spurd.