Apple væntar minni umsetning

Tim Cook, stjóri í Apple, sigur, at tað er serliga á kinesiska marknaðinum, at eftirspurningurin er minkaður. 

Hann heldur, at tollstríðið millum USA og Kina hevur ávirkað søluna á kinesiska marknaðinum.

Apple væntar, at umsetningurin fyrsta ársfjórðing í ár verður 84 milliardir dollarar, ella 550 milliardir krónur. 

Fyrsta metingin segði, at umsetningurin fór at verða millum 89 og 93 milliardir dollarar.

Tim Cook sigur, at tað at dollarin er styrktur, er eisini ein orsøk til nýggju avbjóðingarnar.

Reuters skrivar, at hetta er fyrstu ferð, at Apple endurskoðar sínar metingar, áðrenn roknskapurin verður kunngjørdur, síðani fyrsta iPhonin kom á marknaðin í 2007.

Á marknaðinum, sum gevur ábendingar um, hvat íleggjarar halda, fall partabrævið í Apple niður í átta prosent, tá tíðindini um minkaða umsetningin vórðu kunngjørd.