- Tíðindi, mentan og ítróttur
Heiðursgáva landsins latin Astrid Andreasen
![](https://kvf.fo/sites/default/files/styles/grein-ovasta-mynd/public/astrid_andreasen_0.jpg?itok=C9BwvD24)
Mentanarvirðislønir landsins fyri árið 2018 vórðu í kvøld handaðar á stórum, almennum tiltaki í Mentanarhúsinum í Fuglafirði.
Til handanina verða tríggjar virðislønir latnar. Tær eru Virðisløn til ungt listafólk, sum varð latin Búa Rouch, dansara, Mentanarvirðisløn landsins, og Heiðursgáva landsins.
Listakvinnan, Astrid Andreasen, fær Heiðursgávu landsins fyri sítt ómetaliga stóra íkast til at skjalprógva føroyska mentanar- og náttúruarvin gjøgnum vísindaliga tekning.
Heiðursgávan verður latin fyri at hava virkað til frama fyri mentanarlig virði, sum hava týdning fyri føroyska mentan, list og mentanararv. Umframt heiðurin fær Astrid Andreasen eisini 75.000 krónur.
Fjøltáttað listakvinna av tilvild
Astrid Andreasen er ein fjøltáttað listakvinna. Hon er útbúgvin broderingarlærari, hon hevur teknað frímerkir, og sum vísindaligur teknari hevur hon teknað nærum alt, sum livir og grør í føroysku náttúruni.
Hóast hon var dóttir ein skúlalærara, treivst Astrid als ikki í skúlanum. Eftir ætlan skuldi Astrid á vevskúla í Danmark, men hon endaði við at fara á broderingarskúla.
Í samrøðu við Sissal Kampmann greiddi Astrid frá lívsleið síni, har tilvildin ráddi. Tú kanst hoyra sendingina "Alt av tilvild" her.
Í august í fjør fylti listakvinnan 70 ár. Astrid Andreasen hevði ætlað at verið burturstødd á degnum, men so varð ikki.
Tí í Mullers Pakkhúsi lat stór listaframsýning upp til heiðurs fyri tí fjøltáttaðu listakvinnuna. Dagur og Vika vitjaði listakvinnuna, sum greiddi eitt sindur frá listuni, ið hevur myndað lív hennara:
Stórt ískoyti til føroyska mentanararvin
Í grundgevingini fyri at lata Astrid Andreasen heiðursgávuna, varð sagt, at Astrid Andreasen hevur í meira enn 20 ár virkað sum vísindaligur teknari. Hon hevur lært seg hetta yrkið á Jerlesborgskúlanum í Svøríki. Frá hennara hond liggur hópin av tekningum til gagns fyri gransking og miðling av náttúru- og mentanararvi okkara.
Astrid Andreasen hevur stóran part av sínum arbeiðslívi starvast innan lívfrøði og hevur teknað nærum alt, ið livir og grør í føroysku náttúruni. Fiskar, fuglar, seyðir, hvalir, skordýr, flogkykt, blómur og tari hava bergtikið hana, og hon hevur teknað og skrásett lívfrøðiliga fjølbroytnið við ómetaligari virðing og nágreining. Avrikini hjá Astrid Andreasen hava sett síni spor víða hvar í landinum.
Hon hevur í øllum sínum vísindaliga virki á áhugaverdan og estetiskan hátt ført tað listarliga huglagið inn í skrásetingina, og samstundis hevur skrásetingin givið íblástur til hennara frálíka listarliga virksemi.
Áður heiðrað lista- og mentafólk
Tey, ið áður hava fingið virðislønir handaðar, eru:
Árstal |
Mentanarvirðisløn |
Heiðursløn | Ungt listafólk |
2017 | Barbara í Gongini | Frits Johannesen | Konni Kass |
2016 | Rúni Brattaberg | Steinprent | Anna Malan Jógvansdóttir |
2015 | Annika Hoydal | Palli Gregoriussen | Andrias Høgenni |
2014 | Torbjørn Olsen | Tey av Kamarinum | Mattias Kapnas |
2013 | Tróndur Patursson | Árni Dahl | Trygvi Danielsen |
2012 | Tóroddur Poulsen | Marianne Clausen | Silja Strøm |
2011 | Jóanes Nielsen | Kristian Blak | Sakaris Stórá |
2010 | Sunleif Rasmussen | Jonhard Mikkelsen | - |
2009 | Kári P. | Laura Joensen | - |
2008 | Ebba Hentze | Martin Tórgarð | - |
2007 | - eingin virðisløn latin | - eingin virðisløn latin | - |
2006 | Zacharias Heinesen | Jógvan Isaksen | - |
2005 | Tita Vinther | Emil Jull Thomsen | - |
2004 | - eingin virðisløn latin | - eingin virðisløn latin | - |
2003 | Hanus Kamban | Ólavur Hátun | - |
2002 | Gunnar Hoydal | Axel Tórgarð | - |
2001 | Eyðun Johannesen | Fuglafjarðar Sjónleikarafelag | - |
2000 | Ingálvur av Reyni | - | - |
1999 | Jens Pauli Heinesen | - | - |
1998 | Regin Dahl | - | - |
Harumframt eru tríggjar øðrvísi virðislønir latnar.
Í 2010 fekk Jóhan Hendrik Winther Poulsen Málrøktarvirðisløn Landsins.
Og í 2001 og í 2006 vórðu serstakar virðislønir latnar til ávikavist Ebbu Hentze og Jón Hilmar Magnússon.
Ársins dómsnevnd
Ein dómsnevnd við umboðum úr ymsum listagreinum hevur valt út tey, sum í ár hava fingið virðislønir.
Í dómsnevndini sita Katrina í Geil, Oggi Lamhauge, Knút Háberg Eysturstein, Archibald Black og Alda Joensen.