Fróði Benjaminsen spælir fyri Skála

Skála hevur styrkt hópin við miðvallaranum, Fróða Benjaminsen.

Felagið skrivar á facebooksíðu sínari, at partarnir hava undirskrivað sáttmála, sum er galdandi fyri kappingarárið 2019.

41 ára gamli Fróði Benjaminsen, sum í fjør umboðaði NSÍ, er royndasti spælarin í føroysku kappingini.

Hann hevur spælt tilsamans 563 landskappingar- og steypadystir.

Fróði Benjaminsen eigur metið fyri flest A-landsdystir fyri Føroyar. Hann hevur umboðað Føroyar í 94 dystum.

Skála verður sætta felagið í Føroyum, sum Fróði Benjaminsen umboðar.

Fyrr hevur hann spælt fyri B68, B36, HB, Víking og NSÍ.

Skála skrivar á facebooksíðuni, at Fróði Benjaminsen verður við, tá Skála spælir venjingardyst móti EB/Streymi leygardagin.