HB vann bæði stórsteypini

Fótbóltsárið bleiv sparkað ígongd, tá dystirnir um stórsteypini hjá kvinnum og monnum vóru á Tórsvølli í dag.

Hjá kvinnunum vann HB 7-1 á EB/Streymi/Skála. Hálvleiksstøðan var 3-0 til HB.

Heidi Sevdal skoraði trý mál fyri HB, meðan Elin Maria Isaksen og Rebekka Benbakura skoraðu tvey mál í part.

Birna Tummasardóttir Mikkelsen skoraði málið fyri EB/Streym, tá hon í seinna hálvleiki minkaði til 1-4.

Landskappingin hjá kvinnunum byrjar leygardagin.

Í fyrsta umfari tekur KÍ ímóti B36 í Klaksvík, meðan ÍF/Víkingur/B68 tekur ímóti EB/Streymi/skála.

Menninir vunnu eisini

Føroyameistarin, HB, vann á steypavinnaranum, B36, í seinna dystinum hjá monnunum.

Støðan í hálvleikinum var 0-0, men tá fýra minuttir vóru farnir av seinna hálvleiki, skoraði Símun Samuelsen sigursmálið.

Alex Mellemgaard hjá B36 bleiv útvístur, tá hann fekk sítt seinna gula kort stutt fyri leiklok.

Hann kann tí ikki spæla í fyrsta umfari, har B36 møtir Skála.

Landskappingin hjá monnum byrjar um eina viku. HB skal í fyrsta umfari spæla ímóti KÍ í Klaksvík.