Fleiri flúgva við SAS á føroyaleiðini

– Vit hava merkt ein vaksandi áhuga fyri føroyaleiðini, síðani vit fingu góðkenning, at brúka RNP-tøknina, sigur Mariam Skovfoged, kunningarstjóri hjá SAS.

Tað hevur onkuntíð verið langt ímillum tey - ferðafólkini á føroyaleiðini, ið heldur hava sett seg í flogførini hjá SAS enn hjá kappingarneytanum, Atlantic Airways.

Meðan flogførini hjá SAS stundum hava verið meira tóm enn full á føroyaleiðini, síðani felagið byrjaði flúgvingina fyri tveimum árum síðani, broytist hetta nú so líðandi.

Selja fleiri ferðaseðlar nú

Føroyingar hava annars aftrað seg við at flúgva við SAS á føroyaleiðini, tí flogfelagið hevur avlýst fleiri túrar, tá flogførini ikki fingu sett seg í Vágum.

– Vit seldu fleiri ferðaseðlar beinanvegin, tá vit fingu góðkenning at brúka RNP-tøknina í Føroyum, sigur Mariam Skovfoged, kunningarstjóri hjá SAS.

Í vetur fekk flogfelagið, SAS, góðkenning, at brúka innflúgvingarskipanina RNP. Hetta merkja tey nú eisini væl hjá skandinaviska flogfelagnum.

Heystið og veturin ein avbjóðing

Í løtuni flýgur SAS fýra túrar á føroyaleiðini um vikuna. Flogfelagið ætlar kortini at hækka túratalið í summar, tá summarferðaætlanin kemur í gildi.

Enn er ikki greitt, hvussu nógvar túrar flogfelagið fer at flúgva til og úr Føroyum, tá summarflúgvingin er av, sigur kunningarstjórin hjá SAS.

– Vit vóna, at selja fleiri ferðaseðlar á føroyaleiðini tá heystið og veturin koma, tí tað er serliga tá, vit hava avbjóðingar, sigur Mariam Skovfoged.