Hitamet á grønlendska innlandsísinum

Hósdagin var fyrra metið sett tá ið veðurstøðin á Summit, sum liggur í 3202 metra hædd, mátaði 2,7 hitastig.

Longu dagin eftir varð metið tikið, tá ið mátitólini hjá donsku veðurstovuni, Danmarks Meteorologiske Institut, mátaðu 4,7 stig.

Veðurlagsgranskarar stúra

Hóast okkum dámar væl hita, so fær metið veðurlagsgranskarar at stúra. Hitin merkir, at ísurin bráðnar skjótari enn nakrantíð áður, skrivar TV2.

Metingar siga, at vanliga bráðna millum tvær og fýra milliardir tons av ísi um dagin. Men í hesum hitanum bráðna millum 10 og 11 milliardir tons av innlandsísi.

Sambært norska veðurlagsgranskaranum Sebastian Mernild, er tað hitabylgjan í Europa, sum eisini merkist í Grønlandi. Hann sigur, at ísurin ikki er bráðnaður so skjótt síðani seinnu helvt av 19. øld.