Amasonskógurin brennur

24.08.2019 - 11:24
Aktuelt
Amasonskógurin brennur
Skógareldar herja Amazonas, sum er heimsins størsti regnskógur.
 

Fyrstu átta mánaðirnar í ár hava 73.000 skógareldar verið í Amazonas, til samanberingar vóru 40.000 eldar í fjør.

Amazonas er tilsamans 5 milliónir og 500.000 ferkilometrar til støddar, ella helvtina so stórt sum alt evropeiska meginlandið.

Granskarar siga, at eldarnir kunnu hava stórar avleiðingar, tí skógurin hevur stóran týdning fyri vistskipanina í øllum heiminum.

Millum teirra, sum rópa varskó, er franski forsetin Emmanuel Macron, sum vil hava málið um skógareldarnar í Amazonas tikið upp á G7-toppfundinum um tveir dagar.

- Okkara hús brennur. Bókstavliga. Amazonas brennur. Heimsins lungu, sum framleiða meira enn 20 prosent av súrevnunum á jørðini. Lat okkum kjakast um hetta á G7-toppfundinum, skrivar Macron á twitter.

Brasilski forsetin, Jair Bolsonaro, biður tey 7 stóru londini um at blanda seg uttanum. Hann heldur, at serliga tvitið frá Macron, vísir eina kolonistiska støðu til Brasil.

- Brasilska stjórnin er framvegis opin fyri samskifti við sínámillum virðing. Uppskotið hjá franska forsetanum um at viðgera Amazonas á G7-toppfundinum - sum er ein fundur, har Brasil ikki luttekur - vitnar um ein hjálandahugburð, skrivar Jair Bolsonaro á twitter.

G7-toppfundurin byrjar sunnudagin.

 
Nýggjastu sendingar í ÚV
Mánadag 13. juli
Góðan morgun Føroyar 13.07.2020
111313
Sunnudag 12. juli
Frá stríðsárunum (2:15)
110842
Sunnudag 12. juli
Etos: Hví skulu vit hava etikk?
110676
Nýggjastu sendingar í SV
Leygardag 11. juli
Video: 5mf dreingir, Fjarðastevna 2020
111287
Leygardag 11. juli
Video: 5mf kvinnur, Fjarðastevna 2020
111285
Leygardag 11. juli
Video: 10mf, Fjarðastevna 2020
111283
Leygardag 11. juli
Video: 8mf, Fjarðastevna 2020
111281