- Tíðindi, mentan og ítróttur
3.000 lastir av tunnilsgróti í hagan
Tað gongur skjótt at bora Sandoyartunnilin. Sandoyarmegin eru boraðir 734 metrar og Streymoyarmegin eru boraðir 260 metrar av tunlinum.
Í Sandoynni verður tunnilsgrótið lagt í eitt grótbrot, har tað verður goymt til framtíðar verkætlanir. Í Streymoynni verður grótið koyrt niðan í hagan á Velbastað, har bøur síðani skal leggjast omanyvir.
Nógv kjak um grótið
Síðani tunnilsverkætlanin byrjaði, hevur nógv kjak verið um, hvat grótið úr Sandoyartunnlinum skal og kann brúkast til. Ein ætlan var at víðka um vinnuøkið á Gomlurætt, men semja fæst ikki millum tunnilsfelagið og Tórshavnar Kommunu um tað.
Tí verður hagin á Dali á Velbastað grivin upp og fyltur við túsundtals lastum av gróti úr Sandoyartunlinum. Borurin varð settur í á Gomlurætt 14. august, og higartil eru fleiri enn 3.000 lastir av gróti vippaðar í hagan á Velbastað.
>> SÍ EISINI Sí myndirnar: Her verður grótið úr tunlinum tyrvt
Síðst í juli kærdi býráðslimurin Annfinn Brekkstein loyvið til tyrvingina til Heilsu- og Innlendismálaráðið, sum beindi kæruna víðari til Yvirfriðingarnevndina. Yvirfriðingarnevndin bað síðani um meira kunning og hana fekk nevndin 7. september. Har tykist málið standa í løtuni.
Eingin viðgerð fyribils
Peter Flügge, skrivari í Yvirfriðingarnevndini, segði fyri Kringvarpinum stutt eftir hetta, at kæran ikki kundi fáa steðgandi virknað, tí útgangsstøðið var, at loyvi varð givið longu í 2016.
Tí skuldi nevndin fyrst meta um, hvørt málið skal takast upp til nýggja viðgerð, áðrenn nakað annað kemur upp á tal. Eisini segði Peter Flügge, at fundur í fyrsta lagi fór at vera í dag, 10. oktober, har støða skuldi takast til, um málið fær nýggja viðgerð.
Kringvarpið hevur tó fingið at vita, at fundurin í dag er avlýstur, og tí verður ongin viðgerð fyribils. Meira verður at frætta um málið í sendingini Breddin, í útvarpinum klokkan 17:05.