Havnar uppskoti um vápnahvíld

Samstundis leggur turkiski forsetin sýriska herin undir at hava ábyrgdina av álopi á býin, Manbij, í gjár, har ein turkiskur hermaður lat lív.

Kurdiskar YPG-deildir hava havt valdið í Manbij við stuðli frá amerikanarum. Amerikanska samgongan í Sýria váttaði í gjár, at hon hevur tikið allar sínar deildir úr Manbij.

Hermenn í sýriska stjórnarherinum komu í gjár til býin. Sambært almenna sjónvarpinum í Sýria, skulu sýrisku stjórnardeildirnar stuðla kurdunum í økinum.

 >> SÍ EISINI Innrásin í Sýria er byrjað

Ein turkiskur hermaður lat lív og átta onnur vórðu særd í gjár í álopum við Manbij.

Turkiski verjumálaráðharrin hevur áður sagt, at kurdiskar deildir framdu álopið í økinum. Men í gjárkvøldið segði Erdogan, at tað var sýriski stjórnarherurin, sum leyp á.

Turkaland: 637 hermenn deyðir

– Hetta er úrslit av, at sýriska stjórnin leypur á í økinum. Vit svaraðu dyggiliga aftur, og bóru so í bandi, at stýrið rindaði dýran prís fyri hetta, segði Recep Tayyip Erdogan.

Turkaland er ímóti sýriska forsetanum, Bashar al-Assad, og stuðlar stríðnum hjá fleiri uppreistrarbólkum í móti Assad-stýrinum.

Turkaland sigur, at tilsamans 637 YPG- og PKK-uppreistrarmenn eru deyðir í turkiskum álopum. Turkaland kallar YPG og PKK-uppreistrarmenninar fyri yvirgangsmenn.