Fartelefonin krevur skanningar av andlitinum

01.12.2019 - 14:59
AktueltÚtheimurin
Fartelefonin krevur skanningar av andlitinum
Í dag koma nýggjar reglur í gildi í Kina, har kravið er, at øll, sum fáa sær fartelefon og nýtt nummar í einum handli, skulu skanna andlitið
Nú skal andlitsskanning til fyri at keypa eina nýggja telefon í Kina ella fáa nýtt nummar
 

Orsøkin til nýggja lógarkravið er, at myndugleikarnir vilja vita, at rætta fólkið eigur telefonina. Og telefeløgini skulu syrgja fyri, at tað verður gjørt, og at myndin verður goymd, skrivar franska tíðindastovan, AFP og Ritzau.

Ein talsmaður fyri telefelagið, China Unicoms, sigur við AFP, at reglurnar merkja, at øll, sum keypa eina telefon og fáa sær nýtt nummar, skulu taka mynd av sær sjálvum við at hyggja inn í telefonina og blunka.

Næsta stigið er at økja eftirlitið, stendur í boðunum, sum komu í september. Myndugleikarnir boðaðu frá broytingini í september, og skipanin kemur í gildi í dag.

Kinesiskar telefyritøkur vaksandi áhuga um okkara leiðir

Frammanundan eru reglur galdandi, sum knýta samleikan til fartelefonina. Og mynd av fólkinum verður brúkt í øllum viðurskiftum, alt frá at keypa til kunna fylgja við viðkomandi, skriva AFP og Ritzau, sum Danmarks Radio endurgevur.

Kinesiskar telefyritøkur hava vaksandi áhuga um okkara leiðir, serstakliga orsakað av, at føroysku telefyritøkurnar samstarva við eitt nú KT-risan Huawei um 5G-netið í Føroyum. Tað hevur fingið fleiri útlendskar politikarar og sendifólk at heita á føroyingar um, at venda Huawei bakið.

Carla Sands, amerikonsk sendikvinna í Danmark, sigur í tíðargrein í Sosialinum fríggjadagin, at sannleikin er, at kinesiski tøkniútflutningurin er beinleiðis vandamikil fyri keyparan.

Landsstýrið fylgir neyvt við

Tá lond bjóða út sítt viðkvæma undirstøðukervi til Huawei, ZTE og onnur kinesisk feløg, so góðtaka tey, at arbeiða undir kinesiskum kommunistatreytum, sigur amerikanska sendikvinnan Carla Sands í Sosialinum.

– Tey, sum ikki góðtaka hesi krøv, og sum til dømis stuðla mannarættindakravgongum í Hong Kong, ella blaðstjórar, sum avdúka korruptión og mutur í fólkalýðveldinum Kina, eru veruliga í vanda, og kunnu vænta sær revsing og verða hótt búskaparliga, sigur hon.

Helgi Abrahamsen, landsstýrismaður á økinum, segði við Kringvarpið fríggjadagin, at landsstýrið fylgir neyvt við gongdini í málinum um Huawei, men at tey halda seg til tilmælini frá fregnartænastuni hjá donsku verjuni, og enn hava tey ikki mett, at Huawei setir Føroyar í vanda.

 
Nýggjastu sendingar í ÚV
Mikudag 11. desember
Morgunlesturin mikumorgunin 11. desember 2019
102059
Týsdag 10. desember
Breddin
102050
Týsdag 10. desember
Góðan morgun Føroyar 10. desember 2019
102024
Týsdag 10. desember
Morgunlesturin týsmorgunin 10. desember 2019
102058
Nýggjastu sendingar í SV
Sunnudag 8. desember
Andakt við Marjuni í Kálvalíð
101975
Sunnudag 8. desember
Møti úr Nebo á Toftum
101977
Leygardag 7. desember
Úr savninum: Frætt & fregnað 11:12
101962
Leygardag 7. desember
Úr savninum: Matur og matgerð - røst riv
101961