Fólkatingið játtar 25 milliónir til havgransking

Danska fólkatingið fer væntandi at játta 25,5 milliónir krónur til havgransking á Havstovuni, boðar skrivstovan hjá Edmundi Joensen frá.

Danmark er á nógvum økjum undangonguland, tá tað kemur til at basa umhvørvis- og veðurlagskreppuna. 

Tí hava stjórnin og stuðulsflokkar hennara gingið ynskinum hjá Edmundi Joensen um havgransking í Føroyum á møti, stendur víðari í skrivi frá føroyska fólkatingsliminum.

Játtanin verður latin yvir fýra ár. 4,5 milliónir krónur í 2020, og síðani sjey milliónir krónur í 2021, 2022 og 2023.  Meginparturin stavar frá sokallaðu norðuratlantspuljuni, meðan seks milliónir liggja uttan fyri puljuna.