Lítil ferð á skiftinum til elbilar

Hvørja ferð, ein nýggjur elbilur fer út á føroysku vegirnar at koyra, fara 28 aðrir bensin- og dieselbilar

Tað er framvegis langt ímillum elbilarnar á teimum føroysku vegunum. Bara 29. hvør nýggi persónbilur, sum varð skrásettur í 2019, var eldrivin

Bjarni Mohr

04.01.2020 - 17:03

Tað verða framvegis ikki seldir nógvir elbilar í Føroyum, tá fólk keypa sær nýggjar persónbilar. Nógv tann størsti parturin av bilum, sum blíva seldir, eru bensin- og dieselbilar.

Akstovan skrásetti í fjør tilsamans 2.214 nýggjar persónbilar, men bara ein heilt lítil brotpartur - 3,4 prosent - vóru eldrivnir bilar. Tað vísa nýggj hagtøl, tá árið 2019 er gjørt upp.

76 nýggir elbilar í 2019

Av teimum tilsamans 2.214 nýggju persónbilunum, sum vórðu skrásettir í fjør, vóru bara 76 nýggir persónbilar, sum vóru eldrivnir.

Hetta svarar til, at fyri hvørjar 29 nýggjar persónbilar, sum vórðu skrásettir í Føroyum í 2019, var bara ein eldrivin persónbilur. Restin var bensin- og dieselbilar.

Bilasølan í Føroyum er trífaldað eftir bara tíggju árum. Í 2009 vórðu 697 nýggir bilar skrásettir í Føroyum, sambært hagtalsgrunninum hjá Akstovuni.