– Torført at gera tað tryggari at rógva

Tað skuldi vera ein vegleiðing fyri, hvussu kappróðurin trygt kann byrja aftur. Men tilmælið frá Coronaráðgevingini til Róðrarsamband Føroya líktist meira einum frámæli.

– Har stóð eg so í teirri støðu, at eg ikki reiðiliga kundi síggja, hvussu tað bar til at gera nøkur átøk, sum munandi kundi gera tað tryggari.

Tað sigur Pál Weihe, yvirlækni og limur í Coronaráðgevingini, sum skrivaði tilmælið til Róðrarsambandið, sum at enda tók avleiðingarnar og avgerðina at avlýsakappróðurin í ár.

Hoyr alt innslagið og samrøðuna við Pál Weihe:

Undrast um heimild

Tilmælið, sum gjørdist byrjanin til endan fyri kappróðurin í ár, hevur skapt ávísa undran.

Ivi er sáddur um, hvørt tað er uppgávan hjá Coronaráðgevingini at koma við tilmælum, sum í praksis eru avgerandi fyri, um ein ítróttargrein kann halda fram ella ikki.

Bæði forsetin í Ítróttarsambandi Føroya og løgmaður søgdu við Dag og Viku í gjár, at uppgávan hjá Coronaráðgevingini er - ja - at ráðgeva.

Men sambært Pál Weihe, so hevur hann ikki tikið nakra avgerð um at avlýsa kappróðurin. Hann sigur bara sína hugsan.

 -  Eg eri hóast alt yvirlækni í umhvørvismedisini og professari í fólkaheilsu, so eg havi tann formella kunnleikan til at svara, sigur Pál Weihe.

Pál Weihe, covid-19, korona, corona, Finnur Koba

Òtrygt at rógva kapp

Aftur til tilmælið, sum gjørdist eitt frámæli. Pál Weihe og Coronaráðgevingin søgdu soleiðis í tilmælinum:

"Eg meti ikki, at tað er møguligt at rógva kapp á tryggan hátt út frá einum heilsufrøðiligum sjónarmiði í koronatíðum. Fjarstøðan millum bekkirnir er heilt einfalt ov stutt og andingin hjá rógvarunum av góðum grundum stór og kraftmikil. Hetta hevur við sær, at eitt felags útandingarsirm vil liggja um bátin, so allir rógvarar eru í smittuvanda. Eg havi ilt við at síggja møguleikar fyri verndarátøkum so sum maskum og handskum. Mín niðurstøða er tí at mæla frá at rógva kapp í ár."