Biden vælumtóktur í veljarakanningum

Nýggjastu veljarakanningarnar vísa, at demokratiska forsetavalevnið, Joe Biden, liggur seks prosentstig framman fyri Donald Trump í Florida, sum er ein av statunum, ið Donald Trump vann á valinum í 2016.

Í Arisona stendur á jøvnum, men tað vekir ans, at Donald Trump bara liggur eitt prosentstig framman fyri Joe Biden í Texas, sum vanliga er ein sterkur republikanskur statur.

Texas kann verða ein stórsigur fyri Biden

Tað er YouGov, ið hevur gjørt veljarakanningina fyri amerikansku sjónvarpsstøðina, CBS News.

Sambært eygleiðarum kann tað gerast ein stórsigur fyri Joe Biden, um tað veruliga verður soleiðis, at veljararnir í Texas hesaferð velja demokratiska flokkin.

Donald Trump hevur enn ikki viðmerkt nýggjastu veljarakanningina, men Jason Miller, sum arbeiðir sum ráðgevi fyri Trump í valstríðnum, skrivar á Twitter, at veljarakanningin frá CBS og YouGov er falstíðindi.