Einki samstarv um ruskbrenning

Í samstarvsskjalinum, sum Javnaðarflokkurin og Sambandsflokkurin í býráðnum í Tórshavnar kommunu almannakunngjørdi í gjár stendur stutt og greitt:

"Vit fara at fyrireika nýggja brennistøð, sum vit hava fult ræði á. Samanleggingarætlanin við IRF, sum fráfarni býráðsmeiriluti arbeiddi við, steðgar."

Á vári í 2018 heitti Tórshavnar kommuna á IRF um at kanna møguleikarnar fyri at Havnin gerst limur í IRF og hava somu rættindi og skyldur sum tær 28 limakommunurnar í IRF. 

Livitíðin 15 ár

Ætlanin var, at IRF og Tórshavnar kommuna skuldu leggja kunnandi uppskot fyri allar kommunur á heysti í 2018. Men tað varð av ongum.

Brennistøðin hjá Tórshavnar kommunu, KOB, varð bygd út í 2014. Brennistøðin hjá IRF varð umbygd í 2018. 

Livitíðin hjá støðunum er 15 ár frá tí, tær vórðu umbygdar og útbygdar. Tí er ætlanin at byggja nýggja felags brennistøð fyri alt landið, segði IRF í 2019.