Kringvarpið byrjar at senda hondbólt beinleiðis

– Vit gleðast um møguleikan at bjóða hyggjarunum føroyskan hondbólt. Hondbóltur er áskoðaravinarligur, og lagt er upp til nógvar spennandi løtur, nú kappingarnar fara inn i avgerðandi tíðarskeiðið, sigur Símun Christian Olsen, ítróttarredaktørur í Kringvarpinum.

Ætlanin er at senda tað, ið eftir er av hesum kappingarárinum. Tað vil siga restina av Faxe Kondi-kappingini, umframt Burn- og SMS-deildirnar, tá tær byrja aftur.

Í fyrstu atløgu verður hondbóltur vístur í sjónvarpinum mikukvøld, men tá endaspælið er á skránni, kann verða, at dystir verða vístir um vikuskiftið.

Byrjað verður í kvøld

Endaliga sendiskráin er ikki løgd enn. Miðað verður eftir at vísa so nógv lið, sum gjørligt - bæði hjá kvinnum og monnum.

Fyrsti dysturin verður vístur longu í kvøld, mikukvøldið 27. januar, og hann er í Vestmanna millum VÍF og StÍF. Byrjað verður at senda klokkan 19:50.

– Vit hava ynskt at varpa enn meira ljós á føroyskan hondbólt og fremstu deildirnar hjá bæði kvinnum og monnum, so vit fegnast um, at Kringvarpið nú fer at vísa dystir í SMS- og Burn-deildini og Faxe Kondi-steypakappingini, sigur Gunn Ellefsen, forkvinna í Hondbóltssambandinum.