Broytingar í ferðaætlanini farnar til hoyringar

Ferðaætlanin hjá Bygdaleiðum verður nú broytt eftir atfinningarnar, sum hava verið frammi, síðani Eysturoyartunnilin læt upp.

Strandferðslan ásannar, at ferðslumynstrið er broytt, og at stovnurin tískil má broyta leiðirnar, sum koyra millum Havnina og økini norðan fyri høvuðsstaðin.

Leið 400 fer aftur at koyra millum Klaksvík og Tórshavn gjøgnum Sundalagið, sum tann leiðin gjørdi, áðrenn Eysturoyartunnilin læt upp.

Snarleið

Ein nýggj snarleið, leið 401, fer at koyra gjøgnum Eysturoyartunnilin á morgni og seinnapart millum Klaksvík og Tórshavn, og steðgað verður eftir ætlan í Leirvík, Gøtudali og Runavík.

Leið 450 fer at koyra gjøgnum Eysturoyartunnilin, úr Havn til Strendur og Runavíkar og aftur til Havnar sjey ferðir gerandisdagar. Tann leiðin fer eisini at koyra um vikuskiftið.

Broytingarnar á leiðunum koma eftir ætlaní gildi 1. apríl, og almenningurin kann gera viðmerkingar til ætlaðu broytingarnar til 17. mars, sigur Strandferðslan.