ES og USA revsa russar eftir eitursmál

Evropasamveldið gjørdi longu mánadagin í síðstu viku greitt, at ein semja varð gjørd um, hvussu Russland skuldi revsast.

USA gjørdi í gjár, mikudagin, tað sama. Tað siga leiðandi embætisfólk í Hvítu húsunum í Washington, skrivar tíðindastovan, Ritzau.

Revsitiltøkini hjá ES raka fýra russar. Teirra millum Aleksander Bastrykin, sum stendur á odda fyri eina kanningarnevnd, sum vísir beinleiðis til russiska forsetan, Vladimir Putin.

Revsað eftir nýggjari fyriskipan

USA hevur eisini sett revsitiltøk í verk, men landið vil ikki út við nøvnunum hjá teimum sjey fólkunum, sum verða revsað í málinum.

Tveir serfrøðingar hjá ST komu fyrradagin til ta niðurstøðu, at tað vóru russar, sum eitraðu andstøðuleiðaran, og at nervaeitrið novitjok varð brúkt fyri loypa ótta á fólk.

Revsitiltøkini hjá ES eru sett í verk eftir einari nýggjari fyriskipan, sum kom í gildi í desember í fjør, og hetta er fyrstu ferð, nýggja fyriskipanin verður brúkt.

Inn at sita í hálvttriðja ár

Nýggja skipanin gevur ES møguleika at revsa einstøk fólk, um tey eitt nú hava framt brotsverk móti mannaættini.

Russiski andstøðuleiðarin, Aleksej Navalnyj, varð eitraður í august í fjør, og hann kom aftur til Russland í januar.

Navalnyj varð tíðliga í februar fongslaður, tá ein dómstólur broytti ein treytaðan dóm til trý og eitt hálvt ára fongsulsrevsing.