Nú kunnu í mesta lagi 500 fólk savnast

Nú kunnu í mesta lagi 500 fólk savnast í skipaðum bólkum. Uttan mun til, um tað er úti ella inni. Tað er nýggjasta tilmælið frá landsstýrinum, sum júst er kunngjørt.

– Við góðu smittugongdini í huga halda vit, at tað er ráðiligt at taka enn eitt fet ímóti einum vanligum gerandisdegi, sigur Bárður á Steig Nielsen. løgmaður.

Heimauppihaldið stytt

Landsstýrið hevur eisini gjørt av at stytta heimauppihaldið fyri tey, ið ikki eru liðugt koppsett, úr seks døgum niður í fýra. Heimauppihaldið er tíðarskeiðið eftir, at fólk eru komin til Føroya úr útlondum.

Tað verður mælt til, at fólk ikki fara til arbeiðis, í skúla og ikki koma saman við øðrum fólki fyrr enn negativa kanning fjórða dagin tá fólk eru í heimauppihaldi.

Fremsta orsøkin til, at tað verður mett skynsamt at stytta heimauppihaldið, er, at tilgerðartíðin hjá bretska koronuslagnum er styttri enn hjá vanliga koronufrábrigdinum, sigur Løgmansskrivstovan.

Óvist við teimum stóru festivalunum

Landsstýrið viðger framvegis, nær tað er ráðiligt at skipa fyri teimum stóru festivalunum. Heilsufakligi myndugleikin hevur fleiri fyrivarni, ið mugu umrøðast nærri

Tí ber ikki til at siga við vissu, hvussu verður við størru festivalunum. Miðað verður eftir at koma við einari fráboðan um størru festivalarnar um nakrar vikur, stendur í tíðindaskrivinum.

– Tað eru fleiri spurningar, sum í løtuni eru torførir at svara. Okkara samfelag er lítið og viðbrekið, tí er umráðandi, at fyrilit framvegis verða tikin at fyribyrgja smittubreiðslu, vísir Bárður á Steig Nielsen, løgmaður, á.