- Tíðindi, mentan og ítróttur
Brimil hjálpti tveimum uppsjóvarskipum
Brimil hjálpti tveimum uppsjóvarskipum um vikuskiftið.
Seinnapartin fríggjadagin boðaði Arctic Voyager frá, at hann hevði fingið bellin um skrúvuna.
Arctic Voyager var suðuri móti enska markinum.
Tá Brimil var á veg til Arctic Voyager, ringdi Næraberg og boðaði frá, at har hevði ein maður skorið seg í hondina.
Avtalað bleiv, at Næraberg skuldi hála og sigla á sama stað, sum Arctic Voyager lá.
Arbeiðsbátur eftir manninum
Klokkan hálvgum eitt leygarnáttina fór arbeiðsbáturin hjá Brimli eftir manninum á Nærabergi.
Síðani varð sett fast á Arctic Voyager, og Brimil byrjaði at sleipa hann móti landi.
Klokkan hálvgum sjey leygarkvøldið komu skipini í Nólsoyarfjørð.
Arbeiðsbáturin hjá Brimli fór inn við skadda manninum, sum bleiv lagdur undir skurð seinni sama kvøldið.
Klokkan átta var Arctic Voyager komin at bryggju í Havn, og kavarar fóru niður at skera av skrúvuni.
Arctic Voyager hevði 700 tons av svartkjafti.