Tørvur á 700 starvsfólkum í eldrarøktini

Stórur tørvur er á starvsfólki á vælferðarøkinum næstu 10 árini.

Nú klokkan 10 leggur Búskaparráðið fram sína temafrágreiðing um starvsfólkatørvin næstu 10 árini á vælferðarøkinum. 

Búskaparráðið sigur, at tey í fleiri ár hava víst á avbjóðingina, at tað vera munandi fleiri eldri fólk í landinum um 10 ár, og tí verður stórur tørvur til dømis at fáa fleiri starvsfólk á eldraøkinum og heilsuøkinum, men at politikararnir hava lítið og einki ítøkiligt gjørt við tað. 

706 fulltíðarstørv aftrat

Búskaparráðið hevur roknað seg fram til, at aldursbólkurin við fólki yvir 80 ár fer at vaksa umleið 1.200 fólk, ella 52 prosent, næstu 10 árini.

Í eldrarøktini verður tørvur á 706 fulltíðar starvsfólkum aftrat verandi starvsfólkahópi, umframt 338 nýggum búplássum næstu 10 árini, um verandi vælferðarstig frá 2020 skal haldast í 2030.

Harumframt fara 358 fulltíðar starvsfólk á eldraøkinum frá við eftirløn næstu 10 árini.

Les temafrágreiðingina frá Búskaparráðnum her Starvsfólk á vælferðarøkinum komandi 10 árini

Búskaparráðið vísir eisini á, at tað er serliga á eldra-, heilsu- og barnamenningarøkinum, at avbjóðingarnar eru.

Konjunkturfrágreiðingar hjá Búskaparráðnum hava í seinastuni verið bjartskygdar um gongdina. Sum mótvekt móti hesum einvísa bjartskygni hevur Búskaparráðið í hvørji frágreiðing síðan 2015 nevnt haldførisavbjóðingina, tó uttan at fáa nevniverdan respons frá politisku skipanini.

Seinasta frágreiðingin

Niðurstøðurnar eru, at vit næstu 10-20 árini fara at standa fyri einum samansettum trupulleikamáli, ið politiska skipanin ikki hevur givið stórvegis gætur enn, og heldur ikki hevur raðfest.

Hetta er seinasta uppgáva hjá verandi Búskaparráði.

Løgtingið hevur í dag triðju viðgerð av uppskoti um at broyta Búskaparráðið, soleiðis at landsbankanevndin eisini verður búskaparráð.