Tvær milliónir til Koltursgransking

Aage V. Jensens Fonde letur Tjóðsavninum tvær milliónir, ið skulu brúkast til at kanna plantu- og djóralívið í oynni.

Náttúrugranskingin í Koltri byrjaði í 2019, og hetta arbeiðið kann nú halda fram eftir at peningur er latin til granskingina.

Komandi trý árini verða mannagongdir gjørdar, sum leggja granskingina í eina fasta legu, so til ber at fylgja  broytingum í náttúruni, og ikki minst skjalfesta broytingarnar.

Skal minka um vitanargloppið

Koltur verður fyrsta stóra náttúrufriðøki og rannsóknarstøð í Føroyum. Tiltøk verða eisini gjørd, sum koma at endurbøta partar av oynni til tað, sum er meira upprunaligt.

Tað er alstórur tørvur á at kanna, hvussu náttúran er fyri í Føroyum, og við tíðini fer eisini at bera til hjá føroyingum at síggja náttúru uttan mannaskapta ávirkan.

Granskingararbeiðið í Koltri fer at skapa eitt grundarlag fyri náttúruvísindaligum kanningum í framtíðini. Verkætlanin fer eisini at minka um stóra vitanargloppið innan náttúru í Norðuratlantshavinum, sigur Tjóðsavnið.