Smittutrýstið met stórt: 16 nýggir smittutilburðir

16 nýggir smittutilburðir av koronu vórðu staðfestir í Føroyum seinasta samdøgrið, upplýsir landslæknin á heimasíðuni hjá landsstýrinum, corona.fo, í morgun.

Positivprosentið - tað er, hvussu nógvar kanningar av teimum tiknu eru positivar - var í gjár 2,6 prosent. Hetta svarar til, at ein av 38 kanningum er positiv.

Landslæknin: Smittutrýstið stórt í løtuni

Smittutrýstið er stórt í løtuni, tí so nógv smitta hevur ikki verið í Føroyum síðani mars í fjør, sigur Lars Fodgaard Møller, landslækni, við útvarpið.

Tey smittaðu eru eftir øllum at døma partur av kendari smittuketu. Talan er um bretska slagið av koronusmittuni, B.1.1.7, ið smittar illa.

Í løtuni eru 23 fólk í Føroyum smittað við koronu, tað sum myndugleikarnir vita um. 619 koronukanningar vórðu gjørdar seinasta samdøgrið.