Koronutilmælini ikki broytt í løtuni

Hóast fleiri tilburðir av koronu eru staðfestir hesa vikuna, so eru ongar ætlanir í løtuni um at broyta koronutilmælini. Tað sigur Bárður á Steig Nielsen, løgmaður.

Nú eru 48 fólk sjúk, og yvir 500 fólk eru í sóttarhaldi. Smittuketan er kend, sigur løgmaður, og tí verður mett, at tamarhald er á støðuni.

Landsstýrið fylgir gongdini neyvt, og vísir tað seg at neyðugt er at víðka tilmælini, so verður tað gjørt. Men tað er ikki støðan í løtuni, sigur løgmaður, sum sigur seg hava varhugan av, at fólk virða tilmælini.