Koronulinjan lagt hornið á

Nú ber ikki longur til at ringja til koronulinjuna at spyrja um ymiskt í sambandi við koronu.

Eftir góð 34.000 uppkall og 3.000 telefontímar seinastu 18 mánaðirnar, helt koronulinjan uppat klokkan trý seinnapartin.

- Smittugongdin hevur verið góð seinastu tíðina, komið er langt við koppsetingarátakinum, og vit fáa meira ella minni vanligar umstøður og viðurskifti í samfelagnum aftur, skrivar Heilsumálaráðið. 

Heimasíðan korona.fo er framvegis virkin við kunning, og eisini ber til at bóka tíð til koronukanning og koppseting fyri COVID-19 á koronu.fo.