Koppseting kring landið

Komandi vikurnar fara koppsetingartoymir kring landið at bjóða fólki koppseting. Byrjað verður í Norðoyggjum mánakvøldið. Tað boðar Sjúkrahúsverkið frá í dag.

Tað hevur yvirhøvur gingið væl at koppseta føroyingar, men seinastu tíðina er ferðin minkað nakað. Sjúkrahúsverkið hevur tí, í samstarvi við fleiri kommunur, gjørt nakrar royndir at gera tað lættari hjá fólki at lata seg koppseta. Vitjað hevur verið í Runavík, á Giljanesi og á útoyggj.

Royndirnar av hesum hava verið góðar, og nú verða nýggj átøk gjørd fyri at gera koppsetingina meira atkomuliga hjá fólki, sum hava longri á koppsetingarstaðið.

Byrjað verður nú mánakvøldið og týsdagin í Norðoyggjum, síðani verður vitjað í Sandoynni og ætlanin er eisini at taka allar bygdirnar í Suðuroynni og í Norðstreymi seinni.