KOKS varðveitir sínar stjørnur

Lítla matstovan Frammi við Gjónna við Leynavatn, sum rúmar umleið 30 fólkum, er aftur í ár heiðrað við tveimum Michelin-stjørnum. Tey varðveita eisini grønu viðurkenningina, sum tey fingu í fjør, fyri at arbeiða burðardygt við mati og matgerð.

Poul Andrias Ziska er høvuðskokkur, Karin Visth er matstovuleiðari, men tey vóru ikki til sjálvt tiltakið í Stavanger í Noreg í kvøld. Koronu-tiltøkini í Noreg loyva ikki hesum og tí varð tiltakið sent beinleiðis á netinum.

- Øll 18 árini, eg havi verið í vinnuni, er hetta er eitt tiltak, sum eg altíð havi glett meg til. Eg havi altíð droymt um at vera partur av, at verða partur av Michelin-familjuni og teljast millum hesar fantastisku matstovurnar. Í 2017 fingu vit so fyrstu stjørnuna og í 2019 fingu vit tvær. At vit varðveita hesar og grønu viðurkenningina, vit fingu í fjør, er ein stór viðurkenning av allari orkuni og arbeiðinum, sum so nógv fólk leggja í matstovuna.  Poul Andrias og eg, men eisini restin av toyminum, fólkini aftanfyri, veitarar og ikki minst okkara gestir. Tí eru vit so takksom og gleða okkum til enn eitt ár í yvirlitinum hjá Michelin, sigur Karin Visth, matstovuleiðari.

- Vit hava ongar ábendingar fingið um, at vit fóru at missa eina stjørnu ella fáa eina aftrat. Tí fegnast vit um úrslitið í kvøld, sum vit bæði høvdu vónað og eisini væntað, sigur Poul Andrias Ziska, høvuðskokkur.

Altjóða yvirskriftin eftir tiltakið í kvøld er annars, at danska matstovan Noma loksins fekk tríggjar stjørnur. Tað er tað mesta, sum ein matstova kann fáa.

Søllerød Kro í Danmark, har Jan Restorff er matstovuleiðari, varðveitir sína stjørnu.