Besta føroyska úrslit nakrantíð

Soleiðis sigur ein av venjarunum hjá estetiska kvinnuliðnum Lyra, sum í hesum døgum kappast í World Cup kapping í Finnlandi.

Tað er ein fegin Eyð Strøm, sum vit fáa orðið á, tá liðið hava verið á gólvinum.

- Alt gekk sum tað skuldi, og hesar kvinnurnar vóru stjørnur í dag.

Tað stuttliga er, at so nógv av estetiska umhvørvinum kommenterar, hvussu nógv vit hava flutt okkum, sigur hon.

- At fleiri innan estetiska umhvørvið koma og siga við okkum, at vit hava flutt okkum ein klassa upp í fimleikinum er fantastiskt, leggur hon afturat.

Umframt Lyra, so tekur Hulda úr Havnar fimleikafelag eisini lut í kvinnukappingini, har 15 lið luttaka. Hulda gjørdist nummar 11 í innleiðandi kappingini, og kemur eisini við til finaluna í morgin, á einum sjeynda plássi.

Kappingin er skipað soleiðis at hvørt landið bert fær tvey lið við í finaluna, og tí rykkja føroysku liðini bæði upp á úrslitalistanum undan finaluni sunnudagin.

Unglingar eisini í finaluni

Umframt at kvinnurnar luttaka í World Cup kappingini, so eru tvey unglingalið við í Challenge Cup, sum unglingakappingin eitur. Rósan úr Støkk og Mira úr Havnar fimleikafelag endaðu á ávíkavist 9. og 10. plássi í sera tættari kapping sínámillum, har Rósan endaði eitt vet frammanfyri. Til steypakappingina í Føroyum farna vikuskifti var tað Mira sum endaði beint frammanfyri, so spennandi verður, tá FM verður í mai.

Eisini hesi bæði liðini rykkja upp í úrslitatalvuni í morgin, og koma í finaluna á einum 7. og 8. plássi.

Finalurnar í morgin fyrrapart verða stroymdar, og kunnu síggjast her.