Postmenninir í Havn høvdu fleiri rutur. Summar inni í býnum og aðrar út á Argir og til Hvítanesar. Longsti túrurin hjá Sámali vardi 15 tímar.

Hann fór at kava, tá Sámal kom í Gundadal, men hann stríddi seg allan vegin niðan til Hvítanesar og omaftur. Konuna Jastrud hitti hann á eini seinnapartsrutu í Vesturbýnum.

Stór tøk hjá postmonnunum vóru tjaldursposturin og jólaposturin, tá teir gingu í húsini langt út á jólaaftanskvøld.

Við báti royndi Sámal mest í Nólsoyarfirði. Hann var í mangari grind víða um, og nátatíðina lá hann stundum í Klaksvík.