Meg minnist: Svenning Reinert (3:3)

14-10-2018

Jógvan Arge hittir Svenning Reinert. Triðja og síðsta sending

Næstu sambondini hjá Norðradali vóru Sund, Kaldbak og Havnin. Í Havn var Dalavegurin, og í Kaldbaksbotni var Dalastøðin. Haðani varð farið í báti til handils í Kaldbak. Mjólkin varð reidd til Sunds og flutt til Havnar við mjólkarbátinum.

Leningarlíkindini í Norðradali vóru torfør. Ein fiskileið hjá teimum var kortini Heinafelli, og teir dyrgdu framvið landi. Eitt norskt víkingaskip kom illa fyri í kolturssundi. Svenning var við til at bjarga fólkinum.

Svenning Reinert vaks upp á rossabaki. Í kappríðing vann hann hóp av steypum og heiðursmerkjum. Ein harður kappingarneyti var Uni Patursson. Á ólavsøku 1965 fingu teir somu tíð, 34,3 sek. Svenning Reinert á Grana hjá Otto Reinert varð dømdur vinnari. Hann reið kapp í 68 ár.

Meg minnist

Sendirøðin Meg minnist byrjaði í 2009. Í røðini leggur Jógvan Arge dent á at fáa fólk at siga frá slíkum, sum tey vita og hava upplivað. Sjálvt heitið á sendirøðini er ikki nýtt. Niels Juel Arge brúkti navnið í mong ár til sínar samrøðusendingar, og Jógvan ásannar, at ringt er at finna eitt betri felagsheiti fyri slíkar sendingar.