VIDEO: Óvissa um orsøk til ferðsluvanlukku

Eingi vitni eru til eina ferðsluvanlukku, sum varð fráboðað politistøðini í Havn klokkan 9:52 leygarmorgunin. Tískil er heldur enn ikki heilt greitt, hvør tann neyva orsøkin til vanlukkuna er.

Løgreglan heldur, at høg ferð á bilinum, sum fór á sjógv við Rættargjógv umleið hálvan kilometur áðrenn komið verður til Oyndarfjarðar, kann vera ein av orsøkunum til ferðsluvanlukkuna.

- Tað er eingin ivi um, at tað hevur verið nakað av ferð á bilinum fyri at kunna fara so langt eftir bønum, sigur Jan Fossaberg frá ferðslupolitiinum, sum var á vanlukkustaðnum leygardagin.

SÍ EISINI Ferðsluvanlukka í Oyndarfirði kravt eitt mannalív

Ein 22 ára gamal maður varð funnin deyður á sjónum, har bilurin er farin útav vegnum. Allan leygardagin hava bjargingarlið, froskmenn og bjargingartyrla leitað eftir einum øðrum manni.

Løgreglan heldur seg hava orsøk at halda, at tveir menn vóru í bilinum, sum varð funnin á sjónum leygardagin. Tí hevur í allan dag verið leitað eftir einum 20 ára gomlum manni, men uttan úrslit.

Myndir: Bjarki Thomsen. Klipt: Bjarnheðin í Hoyvík