Í Grindini hesa ferð hitta vit Oddfríð Marna Rasmussen, sum í heyst gav yrkingasavnið, Úrtíð, út. Hetta er seytjanda útgáva høvundans, og Grindin vitjaði Oddfríð til eitt prát um Úrtíð, foreldraleiklutin og barndómin og ungdómin á bygd.

Aftur í fjør stóð bókasølan seg væl, hóast hon í fleiri umførum verður spádd at hvørva í gloymskunar hav vegna frambrot innan miðlar, samskiftistøkni og undirhaldsídnaði. Vit tosa við Berg D. Hansen, bókmentafrøðing, um hetta fyribrigdi.

Síðani verður klassiski leikurin hjá Sofokles, “Elektra”, settur upp á tjóðpallinum. Grindin vitjaði Gamla Mejaríið undir venjingunum. At enda fara vit at fregnast um spennandi mentanarfestivalin, Nordic Matters, ið júst er settur í Southbank Center í London. Festivalurin er eitt samstarv millum øll norðurlond, har fleiri føroysk listafólk luttaka á áralanga festivalinum, sum skal varpa ljós á norðurlendska list. At greiða okkum nærri frá festivalinum hava vit fingið Aldu Joensen frá mentamálaráðnum í sjónvarpsstovuna.

Lagt til rættis: Sissal Kampman, Heini í Skorini og Pætur M. Dahl. Upptøkur og klipp: Hallur Thomsen og Bjarni Rubeksen. Sett saman: Hans Petur Hansen.